Namaligya’g pekeng kwarta nadakpan

CEBU, Philippines — Nadakpan sa mga operatiba sa Criminal Investigation and Detection Group (CIDG)-7 ang 50- anyos nga lalakeng giingong responsible sa pagpakatap og mga pekeng kwarta atol sa entrapment operation Lunes sa hapon diha sa Sitio Mahayahay, Barangay Pasil, Siyudad sa Sugbo.

Giila ang dinakpan nga si Mario Manga Pazon, residente sa Barangay Poblacion, Dakbayan sa Lapu-Lapu.

Ang entrapment operation gihimo human sila makadawat og report nga giingong naghitak ang pagpamaligya og peke nga kwarta sa Barangay Pasil.

Nakig-alayon ang CIDG-7 ss Payments and Currency Investigation Group sa Bangko Sentral ng Pilipinas (PCIG-BSP) aron paghimo og imbestigasyon kabahin niini.

Base sa nadawat nga impormasyon sa CIDG, giingong ang tigpalit sa mga pekeng kwarta sa suspek anha lang moorder pinaagi sa cellphone.

Ang baligya niini, ang pekeng P500 ibaligya niya og P25 samtang ang P1000 tag P50 matag usa.

Ang mga sakop sa BSP mikuyog sa maong operasyon ug matud pa sa CIDG ang BSP mismo miingon nga peke ang maong mga nasakmit nga kwarta gikan sa suspek.

Niresulta sa pagkakompiskar sa kapulisan sa P55,000 nga peke nga kini gilangkuban sa 41 ka buok nga fake P500 bill ug 35 ka buok peke nga tag P1,000.

Wala sab motug-an ang suspek kun kang kinsa gikan o kinsay naghimo sa maong mga peke nga kwarta.

Ang dinakpan mag-atubang og kasong kalapasan sa Article 168 sa Revised Penal Code (RPC) kun Illegal Possession and Use of False Treasury or Bank Notes) in relation to Article 166 Paragraph 1 sa Revised Penal Code. —/IBM (BANAT NEWS)