CEBU, Philippines — Gitigom na sa Department of Social Welfare and Development (DSWD)-7 pinaagi sa Disaster Response Management Division (DRMD) niini ang mga representante sa pilot local government units (LGUs) alang sa pag-implementar sa Risk Resiliency Program (RRP).
Usa kini ka convergence program nga mag-operationalize sa Climate Change Adaptation, Mitigation, and Disaster Risk Reduction (CCAM-DRR) Cabinet Cluster nga adunay kinatibuk-ang tumong nga makabaton og climate ug disaster resilient nga mga komunidad.
Base sa taho sa DSWD-7 ang RRP adunay duha ka model nga mao cash-for-work ug cash-for-training diin ang duha nagtumong sa pagpalig-on sakapasidad sa mga kabus ug komunidad sa socio-environmental risk.
Nagpasabot kini sa paghatag kanila og temporaryo nga oportunidad sa kita baylo sa trabaho sa komunidad o pagtukod sa ilang mga kapasidad alang sa pagpamenos ug pagdumala sa kalamidad pinaagi sa mga oportunidad sa panginabuhian ug pagbansay sa kahanas.
Ang LGU officers, Social Welfare and Development, Planning and Development, Budget, Disaster Risk Reduction Management ug Environment and Natural Resources kabahin sa mga partisipante gikan sa mga Probinsiya sa Sugbo, Bohol, Negros Oriental, ug Siquijor ingon man gikan sa highly urbanized nga mga dakbayan sa Sugbo, Mandaue ug Lapu-Lapu.
Si Regional Director Shalaine Marie Lucero nipahinumdom sa mga partisipante nga ang DSWD maoy nag-una sa paghatag sa mga LGU og technical assistance ug resource augmentation isip tubag, recovery ug rehabilitation nga mga aspeto.
Pinaagi sa pakigtambayayong sa LGUs, ang kolektibong mga paningkamot kinahanglang motubag sa panginahanglan sa pagpanalipod sa mga komunidad ug pamilya sa panahon sa kalamidad ug kini kinahanglang sundon alang sa kaayohan sa rehiyon.
Iyaha usab nga gihisgotan nga ang buhat sa convergence nga kinahanglang magtumong sa kalig-on diin ang tanang gitudloan sa pagpahiangay sa mga pagbag-o ug pagkat-on sa pagsagubang sa maong butang. BDB (BANATNEWS)