CEBU, Philippines — Gimandoan ni Cebu City Mayor Michael Rama ang iyang “Special Attack Legal Team” (SALT) lakip na ang iyang kamagulangang anak nga si Atty . Mikel Rama sa paggukod sa Cebu Ports Authority (CPA).
Giingong wala na usab mahimuot si Mayor Rama sa bag-ong mensahe sa CPA human gisultihan nga mangayo og permiso sa naulahi sa dili pa mopatuman og bisan unsang kalihokan sa Compania Maritima building.
Atol sa flag ceremony kagahapon gitataw ni Mayor Rama nga wala na siya makasabot sa batasan sa CPA kinsa nangangkon nga anaa sa ilahang property ang nahimutangan sa “Compania Maritima”
“Dili ko kasabot nganong hambogero kaayo nang CPA…Dili ko kasabot ana…Asa man sila? Taga diin sila? Naa sila’y city hall? Naa bay city hall ang CPA?”, matud ni Mayor Rama kinsa nihatag og kaugalingong kahulogan sa CPA isip “chicken-pork-adobo”.
Si Mayor Rama nangutana nga kon mahimong tinubdan sa dengue ang maong lugar aduna ba kahay kaugalingong city health ang CPA.
“Inig hugaw sa ilang lugar, ug naay dengue, ug naay sakit, naa na sila’y city health? wala!”, ni Mayor Rama pa.
Gimandoan sa Mayor ang iyang legal team nga dili lung-an ang CPA ug dalhon ngadto sa korte ang ilang engkwentro .
“Special Attack Legal Team (SALT), bring them to court for covering the water..that brings the water to the sea..Bring them to court! That is a directive!”, ni Rama pa. — Cacecent No-ot Magsumbol (BANAT NEWS)