CEBU, Philippines — Nadakpan sa kapulisan sa Dakbayan sa Carcar ang usa ka 24 anyos nga lalake nga giingong ‘bagsik-bagsik’ diha sa Sitio Bacsije, Barangay Ocaña, Dakbayan sa Carcar niadtong adlaw Miyerkules human ang suspek nagbahis-bahis nga nagbitbit og armas.
Ang dinakpan mao si Junrey Ponce Villaver, taga Centro, Barangay Liburon sa naasoy nga siyudad.
Matud pa nabalaka ang mga molupyo sa lugar tungod kay ang suspek notado na kaayong kusog mangita og away ug lider-lider kini sa mga grupo sa mga menor de edad sa lugar nga magsige og pabadlong.
Sigon ni Police Lt. Col. Ardioleto Cabagnot, hepe sa Carcar Police Station ang grupo sab dinakpan kusog mangita bikil sa ubang grupo, ug nalambigit sab sila sa mga ginagmay nga krimen sama sa pagpangawat.
Gitug-an sab ni Cabagnot nga ang mga miyembro sa grupo sa suspek mga pinasagdan sa ginikanan nga matud pa kunsintidor sa binuhatang hiwi aning mga bataa.
Samtang nadakpan sab ang usa ka kanhi sundawo human siya nakuhaan og armas diha sa iyang panimalay sa Sitio Magay, Barangay Tanke, Dakbayan sa Talisay niadtong Miyerkules sa buntag.
Ang gidakop mao si Joseph Regidor Jurado, 32. Ang operasyon gihimo pinasikad sa search warrant nga giisyu ni Judge Marlon Jay Moneva sa Regional Trial Court (RTC) branch 74 tungod sa paghupot og ilegal nga armas. Ang kapolisan nakakuha og .45 nga pistola nga adunay unom ka mga bala.
Matud nhi Police Lt. Col. Randy Caballes, hepe sa kapolisan sa TCPS, si Jurado na-dismiss sa Armed Forces of the Philippines (AFP).
Matud pa ni Caballes nga adunay daghang reklamo batok sa suspek nga magpabuto og pusil sa ilang dapit. —Gabriel Bonjoc (BANATNEWS)