Konseho sa Talisay nipalabang og ordinansa alang sa operasyon sa buwangan

CEBU, Philippines — Gihan-ay sa konseho sa Dakbayan sa Talisay ang operasyon sa mga buwangan pinaagi sa pagpasar og ordinansa.

Si Konsehal Rodulfo “Rodi” Cabigas, chairman sa committee on games, amusement and professional sports nibutyag nga napasar na sa kataposang pagbasa ang ordinansa.

Kini mao ang paghatag og seguridad sa sabongero nga dili na mabalaka panahon nga sila anaa sa buwangan.

Nipasabot si Cabigas nga ilang gisubay ang ordinansa sa Presidential Decree 449 pinaagi sa uniporme nga ordinansa sa ubang lokal nga kagamhanan.

Ubos sa maong ordinansa, sa adlaw nga Dominggo lang ang gitugot lakip na ang mga holiday.

Hinuon mahimo usab sila nga makahatag og special permits basta mobayad ang buwangan.

Matud ni Cabigas nga mao kini ang maghatag og kahapsay sa huna-huna sa mga sabongero nga dili na mabalaka nga rondahon.

Nasayran nga niabot sa kapin sa 100 ka sabongero ang nadakpan niadtong Disyembre 2022.

“Usa dinhi sa rason mao nga makakwarta ang siyudad ug mawagtang na usab ang binuang sa mga raid”, ni Cabigas pa.

Sa laing bain, kapin sa 20 ka tawo ang nasikop sa gipahigayon nga pagpangronda sa kapolisan sa Police Station 3 sa Mandaue City Police Office sa tigbakay diha sa Barangay Tabok, Dakbayan sa Mandaue.

Ang maong mga sugarol naaktohan diha sa tigbakayan ug nakuhaan og duha ka samaran nga manok, buwang, ug dul-an sa P2 mil nga gituohang pusta. Rowena D. Capistrano (BANATNEWS)