Talisay city police napiling numero uno nga police station

CEBU, Philippines — Gipasidunggan ang kapolisan sa Dakbayan sa Talisay isip maoy numero uno nga police station sa tanang component city sa Police Regional Office (PRO-7).

Si Police Lt. Col. Randy Caballes, hepe sa kapolisan sa Talisay maoy midawat sa pasidungog atol sa ilang tradisyunal nga flag raising matag Lunes diha sa hawanan sa Cebu Police Provincial Office (CPPO).

AngTalisay City Police nakakuha sa 90.01 porsyento labot sa Unit Performance Evaluation niadtong buwan sa Disyembre sa miaging tuig.

Si Caballes nalipay gumikan sa tanan niya nga sakop nga mihatag sa ilang tiunay nga serbisyo ug nagpasalamat sab siya sa tanang sektor nga mitabang ug misuporta kanila.

Samtang si mayor Gerald Anthony “Samsam” Gullas nipaabot sab sa iyang pahalipay sa kapolisan sa Talisay

Sa laing bahin nagpahinumdom si Cebu City Police Office Director Police Col. Ireneo Dalogdog sa mga kaubanang police nga dili mokompiyansa aron dili masubli pa ang nahitabo kang Patrolman Lee Rodrocks Carbonilla kinsa giatake sa kasing-kasing samtang miapil og fun run.

Matud ni Col. Dalogdog nga ang Philippine National Police dunay Physical Fitness Program nga ipahigayon kada tuig. Gawas niini, duna sab sila'y kalihukan sama sa zumba, road run ug basketball kada Martes ug Huwebes.

Apan gitataw ni Dalogdog ang kahimtang sa panlawas mag depende sa lifestyle, kun wala'y pasingot ug exercise ug mokalit lang og apil og vigorous activity possible maghatag kini og peligro.

Si Dalogdog miingon nga dili mokompiyansa ilabi na kun kuwang sa pahuway dungan sa pagpasabot nga ang kapolisan dili pareho sa mga sibilyan nga sakto og pahuway kun moapil og ingon ana nga kalihukan. — Decemay P. Padilla (BANAT NEWS)