Rama mipahibawo nga dunay revamp sa City Hall

CEBU, Philippines — Giawhag ni Cebu City Mayor Michael Rama ang mga tapolan nga empleyado sa City Hall nga labing maayo nga mo-resign na lang.

Gipahibalo usab niya nga dunay mahitabo nga re-organization sa nagkadaiyang buhatan sa City Hall ug kini nagpasabot nga ang matag empleyado mahaom gyud sa gitagana nga trabaho niini.

Suma pa ni Rama nga karong tuiga, ang iyang administrasyon motutok sa pagpalambo sa kalidad sa serbisyo sa mga empleyado sa City Hall hinungdan nga gusto niya nga gukdon ang dili magtinarong sa ilang trabaho.

Isip pamaagi usab sa pagbaid sa kapasidad sa empleyado, dunay mga training nga pagabuhaton alang niini. Naandan na sa mayor ang pagsuta sa performance sa mga department head ilabi na sa mga nabuhat nga maayo niini pinaagi sa pagpangutana sa mga achievements sa matag departamento ug kun unsa pa ang nakalinya nga mga buhatonon.

Mao kini ang mahimong basehan sa makab-ot nga desisyon kalabot sa revamp kun paglahugay.

Gipaneguro lang gyud ni Rama nga mahaom ang kaalam sa department head sa buhatan nga iyang huptan. (BANATNEWS)