Housing project sa mga kawani sa City Hall hayan sugdan na
CEBU, Philippines — Aduna nay nakit-an nga lugar ang Cebu City Government Employees Housing Cooperative (CCGEHC) diin ipahimutang ang medium-rise building (MRB) alang sa mga empleyado sa Cebu City Hall nga sakop sa kooperatiba.
Tukoron ang maong MRB sa 2,000-square-meter nga luna diha sa Barangay Maghaway sa Dakbayan sa Talisay .
Segun sa taho sa Cebu City Public Information Office, nagpinirmahay na sa niaging adlaw og Joint Venture Agreement (JVA) ang maong kooperatiba kauban ang T-11 Corporation alang sa konstruksyon sa maong proyekto.
Nitambong sa pinirmahay ang executive secretary nga si Atty. Collin Rosell, mayor’s special assistant on fiscal matters nga si Atty. Jerone Castillo, chairman sa CCGEHC nga si Atty. Dominic Diño, ug mga opisyales sa T-11 Corp.
Kahinumdoman nga niadtong Marso sa niaging tuig , gibanhaw sa mga empleyado sa Cebu City Hall ang kooperatiba nga makatabang sa pagbaton og kaugalingong balay.
Nahulma ang maong kooperatiba niadtong 2013, apan naputol-putol kini tungod sa panaglahi-lahi sa administrasyon.
Aduna kini 700 ka mga miyembro kaniadto ug gipaabot nga ubay-ubay napud ang magpakita og interest nga mosalmot niini. (BANAT NEWS)
- Latest
