Fixers sa LTO Lapu-Lapu gi-drug test, 20 positibo

CEBU, Philippines — Tungod sa tinguha nga drug free workplace sa mga buhatan sa Lapu-Lapu City Hall, mga giingong ‘facilitators’ o fixers sa Land Transportation Office nga naa sa vicinity sa Lapulapu City Hall gipaubos sa drug test pinangulohan sa City of Lapu-Lapu Office on Substance Prevention (CLOSAP) kagahapon adlaw nga Biyernes.

Ang pangulo sa CLOSAP, Garry Lao, miingon nga ang maong mga tawo gitawag og fixers sa LTO-7, apan kun silay pangutan-on “facilitators” lang sila.

Dunay 36 kanila nga gipaubos sa drug test apan nigawas nga 20 ang positibo, 18 ka mga lalaki ug duha ka babaye.

Sumala pa ni Lao, daghang reklamo nga nadawat ni Mayor Junard Ahong Chan may kalabutan sa giingong mga fixers hinungdan nga nagpatawag siya og tigum sa kapulisan uban sa maong mga fixers tungod kay dili ganahan ang mayor nga makulban gilayon sila og kaldero.

Atol sa tigum didto nipadayag ang Mayor sa iyang mga kasagmuyo ug mipahibalo nga dunay mga impormasyon kining nahibaw-an nga aduna nilay tigamitan og ginadili nga drugas.  Ug aron maklaro ang tanan mas maayo mopaubos sila og drug test nga matud giuyonan sa tanang nanambong.

Si Lao miingon nga sila sa CLOSAP igo ra sila mi-asistar sa maong tawo nga bukas pag-apil sa maong programa sa kagamhanan, naa na sa kapulisan ang pagmonitor sa ilang mga binuhatan.

Apan si LTO-7 Regional Director Victor Emmanuel Caindec, nimando sa iyang Chief Operations nga mosulat sa NBI-7 aron sa pagkuha sa mga pangalan sa ‘self-confessed LTO fixers’ aron mapasakaan nila sila og tukma nga kaso.

Dugang pa ni Caindec, mas maayo usab makakuha sila og affidavits gikan aning mga ‘fixers’ ug mobutyag kinsa ang ilang contacts sulod sa maong ahensya.

Sa pikas bahin, pipila ka mga official sa LTO-7 ang mag-atubang og tag tulo ka buwan nga preventive suspension tungod sa giingong mga iregularidad. Sa gipagawas nga pamahayag sa LTO-7 adlaw nga Biyernes ilang gipahibalo nga ang acting chief sa Camotes Island Extension Office Editha Soco, nagatubang og 90 ka adlaw nga preventive suspension sa giingong “loafing from duty during regular office hours, dishonesty, and falsification of public documents.”

Ang rehiyonal nga buhatan sa LTO-7 nitug-an nga si Soco nakadawat sa iyang suspension order ug formal charge niadtong adlaw nga Lunes Enero 23.

Si Caindec nitug-an nga dili pa siya makahatag og dugang detalye tungod kay padayon pa ang imbestigasyon basta ang official charge mao ang loafing and falsification of documents.

Duha usab ka mga opisyal sa LTO-7 Operations Division ang masuspenso sab  tungod sa kasong giatubang nga graft and fraud charges nga wala usa niya hinganli. —/IBM (BANAT NEWS)