P16 milyones nga balor sa shabu nasakmit sa usa kasemana nga operasyon

CEBU, Philippines — Moabot sa P16 million nga balor sa shabu ang nakompiskar sa kapolisan sa Police Regional Office-7 sulod sa usa ka semana nila nga anti-drug operations gikan sa Enero 16 hangtud sa 23.  Nakapahigayon sila og 115 ka operasyon nga miresulta sa pagkasikop sa 161 drug personalities.

Niumol sab ang kapolisan og Center for Public Safety Analysis nga usa ka Israeli-inspired strategy sa pagpukan sa problema sa drugas nga naghatag og kadaot ug hulga sa komunidad.

Sigon ni Police Regional Office-7 Director Brigadier General Jerry Bearis nga ang mga numero nga makita sa PNP Website dako og tabang sa pagpalambo sa public trust ug confidence sa PNP organization.

"The effective crime management of PRO7 strengthens the social fabric of the Central Visayas community and promotes accountability and transparency in the PNP organization", matud ni PBGen Bearis

Sa laing bahin nagpositibo sa paggamit og ilegal nga drugas ang walo sa 28 ka mga kanhi tigamitan og ilegal nga drugas nga migradwar na sa Community Drug Rehabilation Program (CDRP) sa  sa City of Lapu-Lapu Office for Substance Abuse Prevention (CLOSAP) sa siyudad.

Si Police Colonel Elmer Lim, director sa Lapu-Lapu City Police Office (LCPO) miingon nga gipahigayon niadtong Enero 17, 2023 ang surprise drug test .

Suma pa ni Gary Lao ang executive director sa CLOSAP nga ilang ipadangat ang kasayuran ngadto sa korte sa pagsiguro sa mga lakang nga ilang himoon. Lakip sa ilang himoon mao ang paglugway sa rehabilation hangtud nga mahingpit na gayod ang ilang pagbag-o ug dili na mobalik sa maong bisyo. —Romeo T. Limpangog (BANATNEWS)