CEBU, Philippines — Gibana-bana nga moabot ngadto sa 10,000 ka pasahero ang modagsa na usab diha sa Cebu South Bus Terminal (CSBT) aron mopauli ngadto sa kalungsoran sa Probinsiya sa Sugbo pagsugat sa bag-ong tuig.
Matud ni Carmen Quijano, manager sa Cebu South Bus Terminal nga ilaha nang gipaabot ang pagdagsa og balik sa mga tawo hilabina nga weekend.
Gibutyag ni Quijano nga sukad niatong Disyembre 23 hangtud karon gibana-bana sa CSBT nga niabot na sobra 50,000 ka pasahero ang nidagsa diha sa terminal.
Ug Tungod niini, nihangyo na ang management sa terminal og dugang gwardiya nga motabang sa seguridad sa CSBT ug sa Cebu North Bus Terminal.
Sa laing bahin, nasagmuyo si Quijano sa pagbilin sa patay nga puya diha sulod sa pansayan sa mga babaye sa CSBT niadtong Miyerkules sa gabii.
Matud ni Quijano nga wala na mabantayi ang responsable nga nibilin sa puya tungod sa kadaghang tawo nga nagsulod ug gawas sa terminal.
Sa laing bahin usab, ang City of Talisay-Traffic Operations and Development Authority (CT-TODA) nipahimangno ngadto sa mga motorista nga planohon na daan ang ilang mga biyahe pipila ka adlaw ang nahabilin sa dili pa saulogon ang pagsugat sa bag-ong tuig aron dili kini matanggong sa trapiko.
Gipanglantawan sa CT-TODA nga daghan ang manggawas nga sakyanan sa nahabiling adlaw sa tuig 2022 ug nangandam na usab sila niini.
Si Presidente Ferdinand “Bongbong” Marcos, Jr. nipagawas og kamandoan sa pagdeklara sa Enero 2 sunod tuig nga special non-working holiday. — Gabriel C. Bonjoc/BDB (BANAT NEWS)