Bakuna batok COVID-19 sa mga estudyante gihingusgan sa Mandaue

CEBU, Philippines — Gihingusgan pa sa kagamhanan sa Siyudad sa Mandaue ang pagpamakuna batok COVID-19 alang sa mga tinun-an sa elementarya ug sekondariya.

Gibisita niadtong niaging adlaw sa Department of Health (DOH) kauban si Undersecretary Charade Mercandol Grande ug mga personnel sa vaccination team ang mga tuhaan sa siyudad.

Nunot sa mao nilang pagbisita  sa mga tunghaang publiko sa siyudad ilang gipahigayon ang pagpamakuna sa kabataan kini subay sa pagtugot sa mga ginikanan

Gipasabot nila ngadto sa mga ginikanan nga bisan sa pagbalik na sa normal nga kahimtang sa katawhan gikan sa pandemiya ang lokal nga kagamhanan mopadayon kini sa pagpamakuna batok COVID-19.

Naglakip sa gihimo sa kagamhanan sa Mandaue mao ang pasuroy sa kabalayan diha sa kabarangayan nga ang tumong mao ang pagpamakuna sa mga bata nga wala kapabakunahi sa ilang mga ginikanan.

Naglakip  sa mga tunghaan nga gisuroy ug gihimo ang pagpamakuna ngadto sa mga tinun-an mao ang Mandaue City Central Schools, Leonard  Wood Elementary School sa Barangay Jagobiao, Casili School for the Arts., Canduman Elementary Schools  ug  Comprehensive National High School sa  Barangay Centro.

Gipahigayon usab ang pagpamakuna diha sa Subangdaku  Elementary School,  Barangay Alang-Alang Alternative Learning System, Basak Elementary  School ug Labogon National High School.

Nasayran nga ang nabakunahan sa mga molupyo  sa Siyudad sa Mandaue nga gilangkuban sa mga bata ug mga tigulang  ang anaa na sa 85 porsyento alang sa first dose, 79.93 porsyento sa second dose  ug 53.53 porsyento ang nabakunahan gikan sa 5-anyos ang panuigon pataas. (BANATNEWS)