Manag-uyab nasakmita’g P2 milyones shabu
CEBU, Philippines — Mokabat sa P2,108,000 nga kantidad nga gituohang shabu ang nasakmit gikan sa manag-uyab nga nadakpan sa buy bust operation nga gihimo sa mga sakop sa Presinto 3 sa Mandaue City Police Office (MCPO) sa miaging tungang gabii sa Barangay Subangdaku sa Siyudad sa Mandaue.
Si Police Captain Emmanuel Rabaya, hepe sa Presinto 3 sa MCPO miila sa ilang nadakpan nga mao sila sila si James Anthony Paunil, 31, ug uyab niining si Riza Languido Nelorin, 27, pulos molupyo sa Sitio Kawayan, Barangay Lagtang sa Siyudad sa Talisay. Matud pa ni Rabaya nakuha gikan sa duha ang 310 gramo nga gituohang shabu nga gibanabanang nagkantidad P2, 108,000 .
Si Rabaya miingon nga ang mga molupyo sa lugar ang nakatabang sa pagkadakop sa duha.
Samtang nadakpan sab ang uya ka kanhi Overseas Filipino Worker ug ig-agaw niini sa mga tinugyanan sa PDEA Cebu Provincial Office diha sa Barangay Tisa ning Dakbayan sa Sugbo.
Ang nasikop mao sila si Ma. Corazon Caburnay, alyas Cory Caburnay, 36, kanhi OFW sa Saudi Arabia ug ig-agaw niining si Teodulo Canoy, 50, garbage collector.
Nasakmit gikan sa mga dinakpan ang duha ka putos sa gituohang shabu nga motimbang og 51 gramos nga mobalor og dul-an P347 mil, buy-bust money, duha ka cellular phones ug kagamitan sa pagsuyop.
Matud pa ni Leia Albiar-Alcantar, tigpamaba sa PDEA7, dul-an sa usa ka buwan nilang gipanid-an ang duha.
Pito sab ka tawo ang nadakpan sa kapolisan sa Lungsod sa Cordova sa gipahidayon nilang Simultaneous Anti-Criminality Law Enforcement Operation niadtong miaging adlaw. —/IBM (BANAT NEWS)
- Latest