Mga tawo nga molantaw sa viewing deck sa Talisay nagkadaghan

CEBU, Philippines — Daghan ang misaka sa bukirang barangay sa Dakbayan sa Talisay aron magpahangin ug molantaw sa kabukiran.

Usa na dinhi ang viewing deck sa utlanan sa Barangay Campo 4 ug Manipis diin makita ang bukid nga sama og porma sa “dinosaur”.

Nalipay si kapitan Joselito Laurente sa Manipis gumikan kay mabutang naman unya ang mga stalls aron katindahan sa iyang mga konstitwenti.

Apan nabalaka ang kapitan tungod kay ang pagdagsa sa mga tawo makamugna usab kini og daghang basura nga ipangbilin lang sa mga tawo.

Matud pa ni Laurente nga ang basura makita sa kanal ug modagayday kini panahon sa ting uwan.

Subay niini nagpatabang ang kapitan ngadto sa Siyudad aron butangan og job order nga kawani ang lugar diin ang trabaho mao ang pagbantay sa mga tawo nga magpataka og labay sa ilang basura.

Gani tinguha sab niya nga suportahan ang dili pag gamit og plastik sa mga manindahay aron makatabang sa sitwasyon sa kalikupan. (BANATNEWS)