CEBU, Philippines — Moabot sa P7.5 milyones nga balor sa illegal nga drugas ang nakompiskar sa kapulisan sa managlahing buy-bust operations sa siyudad sa Sugbo niadtong Huwebes sa gabii.
Ang Regional Police Drug Enforcement Unit (RPDEU)-7 nagpahigayon og buy-bust operation sa Sitio Eskwelahan, Barangay Buhisan diin 700 gramos sa gituohang shabu nga mokantidad og P4.7 million ang nakuha.
Upat ang nasikop nga giila nga sila si Joselito Tabalino, 38, residente sa Barangay Buhisan; Charles Bacalla, 28; Danny Montemor, 19, ug uyoan niini nga si Maximo Montemor Jr., 33, molupyo sa Barangay Tisa.
Paglabay sa duha ka oras ang mga tawo sa City Intelligence Unit sa Cebu City Police Office(CCPO) nakasikop sab og duha ka tawo nga nakuhaan og 405 gramos sa gituohang shabu nga mobalor og P2.7 million. Ang mga dinakpan mao sila si Reymundo Olasco, 28, kinsa maoy subject sa buybust operation. Nadakpan sab ang kauban niini nga si Glanes Agusto, 26, taga Barangay Duljo Fatima.
Matud ni Police Lt. Col. Allan Madrid Rasario, pangulo sa CIU sa CCPO si Olasco usa ka high-value individual sa kampanya batok ilegal nga drugas tungod kay makabaligya kini og 500 gramo ngadto sa usa ka kilong shabu sa Cebu City. Nakakuha na og impormasyon ang kapulisan kung asa nagkuha si Olasco sa supply sa drugas niini. —/IBM (BANAT NEWS)