CEBU, Philippines — Ang pipila ka kapitan sa mga barangay sa Dakbayan sa Talisay nipadayag nga wala sila’y nakitang problema kong madayon o dili ang piniliay sa barangay ug Sangguniang Kabataan (SK).
Kini human ang Senado ug Kongreso naka-transmit na sa balaodnon ngadto sa opisina ni Presidente Ferdinand “Bongbong” Marcos, Jr.
Ang nasabotan sa Senado ug Kongreso nga dili una ipahigayon ang piniliay karong Disyembre 2022 ug ipahigayon na kini sa buwan sa Oktubre sa sunod tuig.
Gipaabot nalang ang pagpirma sa presidente aron mahingpit na ang pagkanselar sa piniliay karong tuiga. Si Kapitan Osmundo Manreal sa Barangay Pooc nagkanayon nga pabor siya nga madayon ang piniliay gumikan kay adunay opisyales nga wala makahatag og hustong serbisyo ngadto sa ilang mga konstituwente.
Ang kapitan sa Barangay Poblacion Edward Alesna ug kapitan sa Barangay Tabunok Benjie Cabigas sama kini og pamahayg kang Manreal.
Apan si Kapitan Josefina Concial sa Barangay Candulawan ug presidente sa Association of Barangay Council (ABC) gusto nga ma-postpone una ang piniliay aron sila makapadayon sa ilang mga proyekto nga nasugdan. Apan silang tanan parehong nagpaabot sa desisyon sa presidente. — (/BDB) (BANAT NEWS)