Patrol crew sa CCLEX way natala nga violators sa taytayan
CEBU, Philippines — Kapin na usa ka buwan sukad gilusad ang pagka-deputized sa Land Transportation Office (LTO) sa Patrol Crew sa Cebu-Cordova Link Expressway (CCLEX), apan walay natala nga violators sa maong taytayan.
Suma pa sa operations manager sa Cebu Cordova Link Expressway Corporation (CCLEC) nga si Mareon Therese Miole nga dako kaayo og natabang ang pagtuman sa mga motorista sa mga lagda sa trapiko.
Masaligon ang kadagkoan sa CCLEC nga mamintinar gyud ang maong kalamboan aron maseguro ang kaluwasan sa mga motorista.
Kahinumdoman nga sa miaging buwan , gi-turn over sa mga tinugyanan sa LTO ang deputization order alang sa mga Patrol Crew sa CCLEX, nga naghatag kanila og awtoridad sa pagpatuman sa mga lagda ug regulasyon sa trapiko sulod sa 8.9 ka kilometro nga modernong toll facility.
Kini nagpasabot nga maisyohan na og citation tickets ang mga motorista nga dili motuman sa lagda sa trapiko sa maong taytayan.
Dugang pa ni Miole nga nag-agi og subsob nga training ang mga CCLEX patrol crew ingon man usab mga practical exam ug ang LTO mismo ang nidumala sa trainings.
Nasayran nga gawas sa pagpatuman sa lagda sa trapiko, ang mga patrol crew usab ang responsable sa pagresponde sa bisan unsang insidente sa maong dapit ug pagsiguro nga luwas ang road users. Aduna usay smart management traffic system ang CCLEX aron maseguro ang luwas nga pagmaneho sa taytayan.
Mao usab kini ang mo-detect sa traffic load, speed ug vehicle load, license plates, ug road weather conditions. —/MEL (BANAT NEWS)
- Latest