17.5 ektaryang luna sa CentCom nabawi na sa Probinsiya

CEBU, Philippines — Human sa halos tulo ka dekada na-recover na sa Probinsiya sa Sugbo ang kabahin sa 80 ka ektarya sa luna nga ukopahan sa Armed Forces of the Philippines Central Command (AFP-CentCom).  Kini human nga ang Department of National Defense (DND) OIC-Secretary Jose Faustino Jr. ni-turnover sa certificate of title sa 17.5 ektarya nga luna nga naglangkub sa 16 ka parsela ngadto sa opisyales sa Kapitolyo nga gipangulohan ni Gobernador Gwendolyn Garcia atol sa seremoniya nga gihimo diha sa Capitol Social Hall niadtong Oktubre 3, 2022.

Ang maong luna kabahin kini sa 47 ka parsela nga niabot ngadto sa 80 ka ektarya nga gitinguha sa Kapitolyo nga mabawi gikan sa CentCom sa Barangay Apas, Dakbayan sa Sugbo.

Si Faustino ug Garcia, uban ang AFP Chief of Staff Lieutenant General Bartolome Vicente Bacarro nipirma sa Deed of Conveyance alang sa 16 ka luna nga karon ubos na sa pagdumala sa Probinsiya sa Sugbo.

Niadtong tuig 1959, gidonar kini sa Probinsiya sa Sugbo ngadto sa military ubos sa kondisyon nga ang maong luna gamiton lang alang sa “military purpose”.

Apan niadtong  tuig1995 ang opisyales sa Kapitolyo ni-revoked sa maong donasyon human nasayran nga ang CentCom nilapas sa probisyon sa kasabotan tungod kay ang 14 lang ka bahin sa luna ang gigamit sa military samtang ang ubang bahin sa luna nagamit isip housing sites sa mga military personnel ug mga informal settler.  Niadtong tuig 2005, atol sa unang termino ni Garcia isip gobernador sa Probinsiya sa Sugbo niduso kini og ejectment case batok sa CentCom ngadto sa Municipal Trial Court aron ma-recover ang tibuok property.  Nilanat og halos 20 ka tuig ang maong kaso ug niadtong tuig 2019 ang Korte Suprema nidesisyon pabor sa Probinsiya sa Sugbo.

Gihulagway usab ni Faustino nga ang kasabotan karon “win-win solution” kini tali sa probinsiya ug CentCom. BDB (BANATNEWS)