CEBU, Philippines — Namalik na usab diha sa kadalanan ang mga tawo nga magpakilimos diin nasayran nga sa niaging buwan ang maong mga makililimos gihipos na kini sa gobiyerno.
Si Jonathan Tumulak, pangulo sa City of Talisay-Traffic Operation Development Authority (CT-TODA) nanawagan niining mga tawhana nga dili magpundo diha sa Cebu South Coastal Road (CSCR).
Matud ni Tumulak nga risgo kaayo ang gibuhat sa mga makililimos ilabi na nga kusog ang pagpadagan sa mga sakyanan diha sa nahisgutang lugar.
Naobserbahan sa CT-TODA nga ang maong mga makililimos magtabok-tabok kini diha sa karsada aron moduol sa mga motorista o sa mga tawo nga moagi ug mangayo og limos.
Nasayran nga niadtong niaging semana usa ka lalaki nga nagpakilimos ang nadasmagan og motorista maayo nalang gani kay samad sa tiil ra ang iyang naangkon.
Ang maong makililimos didala kini sa tambalanan ug gihatud diha sa buhatan sa City Social Welfare and Development (CSWD). BDB (BANATNEWS)