CEBU, Philippines — Padayon pa ang gihimo nga pagtuon kabahin sa giingong pagtukod sa taytayan gikan sa Sugbo paingon ngadto sa Probinsiya sa Bohol.
Kini ang gibutyag ni Allan Alfon, presidente ug general manager sa Cebu Cordova Link Expressway Corporation (CCLEC).
Si Alfon nagkanayon nga ang ilang consultant nipadayag nga dako ang hagit kalabot sa engineering works.
“Medyo layo pa na siya kay it’s more on engineering challenge rather than financial”, butyag ni Alfon atol sa sideline sa Kapisanan ng mga Broadkaster nga Pilipinas (KBP-Cebu Chapter) meeting kagahapon.
Gipasabot ni Alfon nga diha tunga-tunga sa Lungsod sa Cordova ug Isla sa Olango lawom kaayo ang dagat ug kusog usab kaayo ang balud ug aduna nay gihimong pagtuon kaniadto ang mga Hapon ug Korean ug giingong wala kini makakita og pamaagi.
Matud ni Alfon nga dili pa siya makapadayag kong kanos-a matapos ang gihimo nga pagtuon.
Ang Metro Pacific Tollways Corp. (MPTC) nagplano sa pagtukod og taytayan gikan sa Lungsod sa Cordova padulong sa Probinsiya sa Bohol diin mo konektar kini gikan sa Mactan Island padulong sa Isla sa Olango unya via duct diha sa Banacon Island nga modugtong padulong sa Lungsod sa Getafe, Bohol.
Giingong gibana-bana nga moabot ngadto sa P90 bilyones ang pundo nga gikinahanglan alang sa maong proyekto. BDB (BANATNEWS)