Delos Santos mipadayag sa iyang pagsupak sa P50M nga ayuda sa Luzon

CEBU, Philippines — Duna pa'y nahibilin nga mga buwan sa dili pa matapos ang tuig ug dili matag-an ang panahon sa mga posibleng kalamidad nga masugatan sa mga taga sa siyudad sa Sugbo.

Kini maoy rason ni Cebu City Councilor Mary Ann Delos Santos kun nganong wala siya niuyon sa P50 million nga financial assistance sa dakbayan sa Sugbo ngadto sa mga lugar sa Luzon nga naapektohan sa linog sa miaging buwan.

Kahinumdoman nga naaprobahan sa konseho ang maong tinguha sa miaging semana.

Gitataw sa konsehal nga wala siyay supak nga motabang ang siyudad sa laing lugar, apan ang kantidad lang nga P50 million ang wala niya mauyoni.

Ang reaksyon ni Delos Santos iyang gipabuhagay pinaagi sa iyang privilege speech atol sa regular nga sesyon sa konseho.

“We have to be reminded that our primary mandate when it comes to disaster relief is to come to the aid of our own constituents during disasters and calamities. Mr. Chairman, my dear colleagues, we still have four months to go before the year ends. What if we are struck with another major calamity?” nagkanayon ang konsehal.

Gihulagway usab niya ang maong kantidad sa hinabang nga "misplaced display of charity."

Kauban ni Delos Santos sa wala pag-uyon sa maong kantidad mao ang Minority floor-leader nga si Konsehal Nestor Archival.

Kahinumdoman nga si Mayor Michael Rama maoy ni-request nga motabang ang kagamhanan sa siyudad sa Sugbo ngadto sa mga lugar nga naapektohan sa linog.

Ang giaprobahan nga P50 million sa konseho didto gikuha sa Quick Response Fund (QRF).

Ni-request usab ang Cebu City Council sa buhatan sa treasurer sa siyudad alang sa  balance sa QRF nga gikan sa Local Disaster Risk Reduction and Management Funds sa  2022.

Naapod-apod na ni Mayor Rama sa miaging adlaw sa pipila ka lugar didto sa Luzon ang maong financial assistance. —MEL (BANATNEWS)