Dakbayan sa Sugbo buot ni Rama nga masama sa Singapore

CEBU, Philippines — Hugot nga pakig-alayon sa ubang ahensiya sa gobiyerno ingon man sa Cebu City Transportation Office ang usa sa mga pamaagi aron makab-ot ang tinguha ni Cebu City Mayor Michael Rama nga masusama sa nasud nga Singapore ang siyudad.

Kini ang gibutyag ni Retired General Debold Sinas kinsa gikuha ni Rama isip adviser sa public safety ug peace and order sa bag-ong administrasyon niini.

Matud ni Sinas nga usa kini sa iyahang specialty ug usa sa mga buhaton niini mao ang pag-activate sa tri-bureau nga gilangkuban sa Bureau of Fire Protection, Bureau of Jail Management and Penology ug Philippine National Police.

Giingong gikinahanglan usab ang hugot nga pakig-alayon sa Cebu City Transportation Office (CCTO) ilabi na nga ang gusto ni Rama nga masama ang dakbayan sa Sugbo sa Singapore.

Usa usab sa gisugyot ni Sinas kang Rama nga giaprobahan sa mayor mao ang pagpadayon sa anti-drug operations ug tutokan niini ang pagpahigayon og random drug testing sa mga personnel sa city hall.

Ug kon mahan-ay na sila sa pag-set-up sa ubang ahensiya sa gobiyerno nga naglambigit sa public order and safety makig-alayon dayon si Sinas sa konseho sa siyudad ingon man sa Association of Barangay Council(ABC).

Giklaro ni Sinas nga importante ang komunidad apan sa dili pa sila mo-engage kinahanglan nga duna sila’y konkretong plano aron nga masabtan nila ug sa dili pa mapatuman mohimo usab sila og konsultasyon. —BDB (BANATNEWS)