CEBU, Philippines — Dili matawag nga susama og "tsismis "ang kasaysayan sanglit aduna man kini igong basehanan.
Kini maoy reaksyon sa pangulo sa Cebu City Cultural and Historical Affairs Office (CHAO) nga si Bryner Diaz kalabot sa kontroberysal nga linya sa aktres nga si Ella Cruz kinsa nibuhi og mensahe nga “history is like tsismis.
Nagkanayon si Diaz nga dili basta-basta ang naagian sa pag-presenta sa kasaysayan sanglit gipaubos kini sa lapad nga mga pagtuon ug lig-ong basehanan.
"Pasayloon nalang na nato si Ella Cruz, kay siya mismo, wala masayod sa iyang gisulti," matud pa ni Diaz.
Nasayran nga sulod sa pipila ka mga adlaw, gisumsoman sa mga kritiko ni Cruz ang linya niini nga nag-ingon, “History is like tsismis. It is filtered and dagdag na rin, so, hindi natin alam what is the real history. Andoon na iyong idea, pero may mga bias talaga. As long as we're here alive at may kanya-kanyang opinion, I respect everyone's opinion," matud pa sa aktres.
Si Cruz maoy nagdala sa karakter ni Irene Marcos sa pelikulang “Maid In Malacañang” nga ubos sa direksyon ni Darryl Yap kinsa nailhan nga supporter sa mga Marcos. —MEL (BANATNEWS)