CEBU, Philippines — Gipadayag ni mayor Gerald Anthony “Samsam” Gullas nga dili na siya mamolitika ug mopadayon na sa pagserbisyo sa mga Talisaynon. Suma pa sa mayor nga iyang ipadayon ang Aksyon Agad Desk sa district hospital alang sa libre nga pagpa ospital, libre nga laboratoryo ug libre nga paglubong gikan sa partner nga punerarya.
Naglaraw si Gullas nga palapdan ang Aksyon Agad Social Services pinaagi sa pag sulod og Memorandum of Agreement aron libre nasab ang magpa MRI ug CT-Scan sa mga clinic, ug mga pharmacy sa Talisay.
Mogasto sab ang siyudad og konkreto nga skills training aron magamit na ang livelihood center sa barangay Lagtang nga adunay siyam ka kurso nga accredited sa TESDA.
Ang mga kurso mao ang Bread and Pastry Production, Slaughtering, Electrical Installation and Maintenance, Bookkeeping, Event Management, Driving, Emergency Medical Services, Housekeeping ug Shielded Metal Arc Welding.
Samtang ang 18 ka kurso nga gilaraw sa dili pa mahuman ang iyang termino mao ang Cookery, Food And Beverage, Plumbing, Pipe fitting, Bartending, Dressmaking, Hospitality Management, Organic Farming ug Front Desk.
Mohimo og kamanduan si Gullas nga motugot na sa face to face nga klase tungod kay base sa project balik buhay nakabakuna na sila og 83.54 porsyento sa mga Talisaynon.
Gitinguha sab ni Gullas nga palamboon ang ekonomiya sa siyudad pinaagi sa pagpanindot pa sa Poblacion Park, phase 2 sa proyekto nga maghimo sa boardwalk padung sa dagat ug panindoton ang mga estatuwa sa landing. Ablihan nila ang Aksyon Agad Social Services building sa city hall uban sa dialysis center ug anha ibutang ang city health office aron ang mga serbisyo mapaduol sa katawhan. —MEL (BANATNEWS)