Gitulis gipatay sa pag-umangkon

CEBU, Philippines — Usa ang patay ug usa ang angol sa nahitabong pagpanunggab sa duha ka ginang nga nahitabo niadtong Domingo sa hapon sa San Juan Purok 3, Barangay Bonbon, Lungsod sa Aloguinsan.

Ang nakalas naila nga si Arsenia Alidani, samtang ang naangol mao si Belen Biton, 53 anyos, minyo ug residente sa maong lugar.

Ang suspetsado giingong pag-umangkon sa mga biktima nga si James Harvey Nengasca kinsa padayong gipangita sa mga otoridad.

Matud pa ni Police Staff Sergeant Marvin Hubahib, Desk Officer sa Aloguinsan Police Station wala na diha ang suspetsado sa ilang pagabot ug wala na usab panimuot ang biktima nga nakalas.

Gidala sa tambalanan ang mga biktima apan nakutloan gayud sa iyang kinabuhi si Alidani, samtang si Biton luwas na ang kahimtang bisan nakaangkon og daghang samad dinunggaban.

Si Hubahib, nitug-an base sa pasiuna nga imbestigasyon giingong nahibulong si Biton nganung adunay kasikas sa tindahan ni Alidani hinungdan nga iyaha kining gisusi apan naabtan niini ang biktima nagkadugo ug adunay mga samad dinunggaban.

Gitug-an ni Hubahib, dali unta mogawas ni Biton aron mangayo ug tabang apan nibutho sa iyang likod ang suspek ug gisampungan ang iyang baba aron dili makasiyagit ug gidungab siya niini sa makadaghan higayon.

Nakalighot palayo si Biton gikan sa suspetsado ug nakapangayo og tabang sa mga silingan hinungdan nga miikyas si Nengasca.

Ang kapulisan nagtuong tulis ang motibo sa suspek. Nasayran sab nga sugarol ug dako na ang pildi sa suspek sa sugal.

Gi-post na usab sa Aloguinsan Police Station ang hulagway sa suspetsado diha sa ilang social media aron makahatag og information sa nahimutangan niini.

Kun kinsa man ang dunay impormasyon bahin sa suspek mahimong tawagan ang Aloguinsan Police Station sa ilang hotline number 09089157218/09278801190. —IBM (BANATNEWS)