CEBU, Philippines — Miabot sa 203 ka mga Persons Deprived of Liberty (PDL) sa barangay Maghaway, Dakbayan sa Talisay ang nigradwar sa Technical Education and Skills Development Authority (TESDA).
Si mayor Gerald Anthony “Samsam” Gullas nalipay sa iyang nakita nga ubay-ubay sa mga binilanggo ang nipaso ug nakat-on.
Matud pa ni Gullas nga gihimo ang programa aron kun sila makagawas sa bilangguan andam na sila nga mosulod og trabaho alang sa ilang kabag-ohan sa ilang kinabuhi.
“As what we aim in the Talisay City Government, magbuhat ta og programa nga makatabang sa mga PDL nga gusto mag bag-o and equip them with the necessary skills in order to help them in having better life in the future once makagawas na sila,” asoy pa ni Gullas.
Ang mga PDL nipadayag sa ilang kasinatian sulod sa bilangguan ug unsa sab ang ilang nakat-onan nga dili na buhaton inig gawas nila.
Nagkanayon si Gullas nga magpadayon ang ilang programa inubanan sa TESDA kay sila sa kagamhanan naa ra nga andam mosuporta sa kalihukan nga makatabang sa mga konstituwenti. —MEL (BANATNEWS)