CEBU, Philippines — Gibalik na ang clamping operations diha sa kadalanan sa Dakbayan sa Talisay batok sa mga nanagiya og mga sakyanan nga magpataka lang og parking.
Si Jonathan Tumulak, pangu sa City of Talisay-Traffic Operation Development Authority (CT-TODA) miingon nga maghimo sila og operasyon sa coastal area ug kung kini mahuman ila na sab sugdan ang clamping operations sa ubang bahin sa siyudad.
Kahinumdoman, temporaryo nga gihunong ang clamping sa dihang nagsugod ang pandemya niadtong 2020.
Nagkanayon si Tumulak nga nagbutang sila og dugang nga mga signages sa gipangdili sa lagda sa karsada aron mahatagan og pasidaan ang mga motorista ug aron dili na sab makapangrason ang mga malapason kun sila madakpan.
Ang mga tagiya sa mga sakyanang ma-clamp makamulta og usa ka libo ka pesos base sa City Ordinance.
Ang mga tawo nga motangtang sa clamp o mopugos sa pagpadagan sa sakyanan nga moresulta sa pagguba sa clamp pasakaan og kasong kriminal.
Gihangyo ni Tumulak ang mga tawo nga motuman sa lagda aron di na mahasol.— IBM (BANATNEWS)