Duna nay tunghaan sa Cebu City nga nag-face to face classes na
CEBU, Philippines — Pipila ka mga tulonghaan sa urban barangays sa Dakbayan sa Sugbo ang nagsugod na sa ilang face to face nga klase adlaw nga Lunes.
Usa ang Abellana National School ang niabli sa ilang face to face classes kagahapon Mayo 30, 2022 gikan sa Grade 7 hangtud sa Grade 12.
Matud pa ni Rommel Villahermosa, ang Assistant Principal sa Abellana National School, 120 lang ka mga tinun-an ang gitugotan nga makaapil sa linawas nga klase. Ang matag lawak duna ray 20 ka mga estudyante.
Sumala pa ni Villahermosa, higpit nga gipatuman ang mga health protocols ug lakip ang pagpatuman sa social distancing, lakip ang pagbutang sa pangalan sa mga estudyante diha sa lingkuranan aron dili na sila magbalhin-balhin.
Gipasabot sab niya nga wala pugsa ang mga tinun-an pagpatambong sa klase ug gani daghan gyud unta ang gusto na niini, apan tungod sa limitasyong gimando sa DepEd dili pa nila kini mahimo.
Gipaneguro ni Villahermosa nga bakunado tanan nilang mga magtutudlo
Ang tinun-ang si Myles Gatchalian, nalipay pagbalik sa face to face classes tungod kay lahi ra gayud ang linawas nga klase kung anha ra gayud sa balay, kinahanglan matud pa niya nga mapasabot sila sa ilang mga magtutudlo sa mga leksyon nga nakapalibog kanila.
Si Police Lt. Colonel Janette Rafter, Deputy City Director for Operation sa Cebu City Police Office miingon nga duna silay gipakatap nga kapolisan sa mga tunghaan alang sa seguridad. —IBM (BANATNEWS)
- Latest