CEBU, Philippines — Bisan sa gihimong pagpangandam ug subsob nga testing ug final testing sa 180,000 ka mga vote counting machines pipila ka adlaw sa wala pa kini gamita sa eleksyon kagahapong adlawa, moabot og 1,800 ka makina ang nipalyar sa tibuok nasud sumala pa sa Comelec.
Dinhi sa Sugbu, sobra 50 ka VCMs ang gikatahong nag malfunction atol sa adlaw sa eleksyon kagahapon matud pa ni Atty. Jerome Brillantes ang acting Cebu Provincial Election Supervisor.
Kining maong mga VCMs gidestino sa nagkalain-laing polling centers sa Lapu-Lapu City, Mandaue City, Cordova, Talisay City, Barili, Sibonga ug Oslob.
Matud ni Arvin Maghanoy ang election officer III sa lungsod nga naguba ang mother board sa VCM, gipulihan kini og lain, pasado na alas- 6 sila nakasugod og botar.
Sa Dakbayan sa Sugbo aduna sab nipalyar nga VCM sa usa ka clustered precinct Mambaling Elementary School kay di moprinta sa resibo sa dihang gitestingan sa wala pa magsugod sa pagbotar ang mga tawo.
Ang electoral board mipapadayon sa pagpabotar sa mga botante ug gihipos lang usa ang ilang mga balota samtang giayo ang VCM.
Matod ni Gabriel Bitang ang usa sa mga technical support staff nga pipila sa parte sa VCM ang ilang giilisan. Alas-9 na sa buntag kini naayo ug gisugdan og pabasa ang mga balota. Gawas sa malfunction sa VCM, kasagaran usab nga "minor glitches" nga nahitabo sama sa paper jams ug wala pagluwa sa VCM sa mga balota.
Dinhi sa Central Visayas giangkon ni Comelec -7 Director Dennis Auzan nga dunay 8,189 ka mga VCM nga gigamit sa rehiyon kagahapon.
Dunay tulo ka clustered precincts ang nalangay human nakasugat ug gamay nga problema sa ilang mga VCMs. Kini mao ang mga VCMs sa Duero sa Bohol ug duha sa Lazi, Siquijor.
Dugang pa ni Auzan, aduna silay Technical Support Staff nga moayo sa mga makina.— Rowena D. Capistrano/IBM (BANATNEWS)