CEBU, Philippines — Gipahibalo ni Cebu City Councilor Jocelyn Pesquera, pangulo sa Cebu City Tourism Commission nga daghan ang mga programa nga ilang itanyag karong tuiga isip parte sa pagpa-ugmad sa turismo sa siyudad.
Human nalusad ang “Highland Pilgrimage Tour” ,“Highland Blooms and Eco-Tourism” ug “Chasing Waterfall”, target usab karon sa buhatan ni Pesquera mao ang pagpalambo pa sa nasugdan na nga culinary tourism.
Atol sa programa nga “Kasayuran ug Kalamboan” gitataw sa Pesquera nga nailhan usab ang Siyudad sa Sugbo sa pagdalit og lami nga mga pagkaon ug nahimo kini nga ilado bisan sa lain pa nga lugar.
Usa sa nahisgotan ni Pesquera mao ang siomai sa Tisa ug ang larang sa Pasil ug adunay tuslob buwa sa Barangay Suba.
"Daghang putahi nga mga lami diri sa Siyudad sa Sugbo nga atong i-promote this year”, butyag ni Pesquera.
I-promote usab ni Pesquera ang nagkadaiyang festival sa kabaranggayan.
Gani anaa na'y kasamtangang “Puso Festival” sa Barangay Inayawan, Siomai Festival sa Barangay Tisa, ug Mangga Festival sa Barangay Kalunasan.
Plano usab ni Pesquera nga banhawon ang Tartanilla Festival sa Barangay Dulfo Fatima.
Matud ni Pesquera nga sa kadaghang nindot nga mga butang nga gitanyag sa siyudad siguradong madani gyud ang mga turista sa pag-estar og dugay.
Lain paaboton sa mga turista mao ang bird watching, scuba diving ug island hoping.
Gitinguha sa kagamhanan sa Siyudad sa Sugbo nga malusad kini sa dili pa matapos kining tuiga. —BDB (BANATNEWS)