Talisay for Leni gilusad kagahapon

CEBU, Philippines — Gilusad diha sa Dakbayan sa Talisay ang “Talisay for Leni”sulod sa St. Scholastica’s Academy sa Barangay Lagtang, Martes sa buntag nga gitambongan sa mga volunteers niini.

Usa ka Santos nga Misa ang gipahigayon nga gisundan sa ilang pagpamahaw ug lugaw dayon ang pagpahigayon sa motorkada tuyok tibuok siyudad.

Matud pang Atty. Romeo Villarante kinsa nangulo sa maong kalihokan pagpakita ug pagpahibalo kini nga sa Dakbayan sa Talisay adunay mapaabot nga suporta si Vice President Leni Robredo.

Si Robredo magpapili pagka-presidente ug pares niyang running mate  si Senador Francis “kiko” Pangilinan.

Sumala pa ni Villarante sa umaabot nga mga adlaw aduna pay daghang kalihokan silang pagahimuon ug malaumon siyang daghan pang mga moboluntaryo pagtabang kang Robredo.

Si Villarante miingon nga usa sa ilang tumong nga mapasabot ngadto sa mga kabus ang mga hiyas nga gihuptan ni Robredo ug Pangilinan nga makatabang kanila ilabi na sa kinaiya sa duha nga puno sa gugma sa nasud ug sa katawhan nga maoy gusto sa kadaghanan.

Si Joksan Brazuela uban sa iyang grupo nituo nga si Leni mao ang ilang modernong Bonifacio nga makigbisog sa kurapsyon sa karon sa administrasyon.

Gibana-bana 50 ngadto sa 70 ka mga sakyanan ang niapil sa maong motorkada.

Si Jonathan Tumulak, traffic czar sa Syudad sa Talisay nibutyag nga ila lang gihangyo ang organizer nga limitahan ang mga sakyanan nga mokuyog aron mamenosan ang kahuot sa trapiko.— IBM (BANATNEWS)