CEBU, Philippines — Ang Police Regional Office (PRO)-7 nipahigayon og usa ka adlaw nga Synchronized Enhanced Managing Police Operations (SEMPO) diin dili mominus 8.4 milyones nga balor sa ilegal nga drugas ang nasakmit samtang 545 ka mga malapason ang nasikop sa tibuok Central Visayas.
Ang SEMPO gipahigayon niadtong adlaw nga Domingo nga nagsugod sa tungang gabii sa Nobiyembre 27 ug natapos sa alas 11:59 sa sunod adlaw, Lunes. Kini gisalmotan sa tanang police offices, stations ug units, sa tibuok Central Visayas.
Atol sa operasyon, nasikop ang di mominos 164 ka mga nalambigit sa ilegal nga drugas atol sa 131 ka mga operasyon nga gihimo nga niresulta sab sa pagkasakmit sa 577.75 gramong gituohang shabu nga gibanabanang mobalor og di mominos P4 milyones.
Gibana-bana sab nga P4.5 milyones nga balor sa marijuana ang naibot ug gisunog sa maong adlaw sa operasyon.
Sa mga operasyon batok sa ilegal nga sugal, 219 ang nadakpan samtang adunay labing menos P18,311 nga kwarta ang nakumpiska.
Sa kampanya batok sa loose firearms, ang PRO-7 nakahimo og 188 ka mga operasyon ug 199 ka armas ang na-surrender ug nasakmit samtang 28 ka tawo ang nasikop. Sa mga operasyon batok sa mga wanted person, 134 ka tawong adunay warrant of arrest ang nasikop.
Si Police Brigadier General Roque Eduardo Vega, miingon nga kini walay hunong nga mga operasyon batok sa tanang matang sa kriminalidad sa rehiyon nakabaton ug positibong epekto sa mata sa publiko.
Giawhag usab niya ang publiko nga dili magduhaduha sa pagtaho sa kapulisan kun dunay krimen diha sa ilang dapit.
Sa pikas bahin, P38.7 milyones nga kantidad sa ginadiling drugas ang nasakmit sa Cebu City Police Office sa bulan Nobiyembre ning tuiga sumala pa ni Police Colonel Josefino Ligan.
Matud pa ni Ligan sugod Nobiyembre 1 ngadto sa 29, niabot ngadto sa 5.7 kilong shabu ang ilang nasakmit nga mobalor og P38.7 milyones kapin o kulang.
Matud ni Ligan, nabantayan nila nga mas daghan ang nasakmit nila sa miaging buwan kun itandi sa mga bulan gikan sa Agusto, Septiyembre ug Oktubre nga tag tulo ra ka kilo.
Gisusi nila karon ang hinungdan sa pagsaka sa gidaghanon sa ilang nasakmit.
Sa talaan usab sa CCPO sa ilang gihimo nga SACLEO niadtong adlaw nga Biyernes nakahimo sila og 103 ka operasyon ug 119 ang ilang nadakpan, samtang 288 gramong shabu ang ilang nasakmit.— Rowena D. Capistrano/IBM (BANATNEWS)