San Fernando Port Project sugdan Enero sunod tuig

CEBU, Philippines — Gikatakdang sugdan karong Enero sa sunod tuig ang pag-trabaho sa San Fernando Port Project diha sa barangay Poblacion, San Fernando, Cebu.

Kini ang gipahibawo sa Cebu Port Authority human makompleto sa CPA ang procurement activities human usab kini makadawat sa approval sa pag-award sa kontrata ngadto sa WTG Construction and Development Corporation gikan sa Cebu Port Commission.

Suma pa sa CPA ang proyekto hatagan og pundo sa Department of Transportation ug aduna kini approved budget nga mokabat sa  P336,114,557.47alang sa demolition kun pagguba sa karaan ug gubaon na nga pantalan ingon man ang pagtukod sa bag-ong roro facility.

Sa iyang statement, si CPA general manager Leonilo Miole miingon nga ang CPA mo-isyu og Notice of Award, mopirma sa kontrata ug dayon mo-isyu sa Notice to Proceed aron kasugdan na gilayon ang groundwork ug construction unya sa  Enero 2022.

Ang proyekto gipaabot nga makompleto unya sa May 2023.

Sa higayon nga mahuman, ang maong pasilidad mahimong kabahin sa Central Spine Roro Route Project sa DOTr nga gitumong aron masiguro nga ang pasilidad makatabang sa pagpalambo sa negosyo ug turismo.

Atol sa bidding niadtong October 5, 2021, 4 ka bidders ang misumitir sa ilang bid documents nga mao ang Vicente T. Lao Construction, WTG Construction and Development Corporation, BNR Construction and Development Corporation ug joint venture tali sa RCDG Construction Corp., BSP & Company Inc. and Great Swiss Metal Builders Corporation.

Ang WTG Construction and Development Corporation maoy nakasumitir sa kinaubsan nga bid price nga moabot sa P335, 014,472.15.

Ang San Fernando Port Project gipaabot nga makaserbisyo sa mga sakyanan sa dagat nga nagbiyahe gikan sa lungsod ngadto na sa Tubigon ug Jagna ports sa Bohol, ngadto na sa municipalities sa Mambajao ug Mahinog sa Camiguin ug dayon mohunong sa Balingoan ug  Cagayan de Oro sa Misamis Oriental. (BANAT NEWS)