CEBU, Philippines — Nagsugod na ang Cebu City Health Department pagbansay sa ilang mga volunteers, encoders ug uban nga apil sa motabang sa umaabot nga 3-Day Vaccination Drive nga mahitabo karong Nobyembre 29, 30 ug Disyembre 1.
Si Dr. Jeffrey Ibones, officer-in-charge sa CCHD dunay 90 ka vaccination sites nga umolon anang mga adlawa mao nga kinahanglan nila ang daghang tawo nga motabang.
Hinuon, kadtong mga barangay nga daghan na sa ilang populasyon ang nabakunahan dili na butangan og vaccination site, samtang duna say butangan og tagduha ka vaccination sites nga ibutang tungod kay daghan pa sa ilang mga residente ang wala pay bakuna.
“Dili tanang barangay naay sites, like for example Kalubihan, ang Kalubihan niabot ta og 200 percent, ang Banilad niabot mga almost 90 percent, ang Capitol site 95 percent wala nato lang butangi but dili ingon wala sila’y site dili na sila pwede magpabakuna pwede gihapon dad-on ang ilang mga vaccinee didto sa mga sites nga duol nila mostly more than 80 to 90 percent nga mga barangay naay site,”pasabot ni Ibones.
Ang mga barangay nga butangan og duha ka vaccination sites mao ang Barangay Mambaling, Lahug, Cogon- Pardo, Kinasang-an, samtang ang Guadalupe butangan og tulo ka vaccination site tungod kay daghan pa sa ilang mga residente ang wala pa mabakunahi.
Atol sa maong adlaw, mamahimo rang mag-walk-in ang mga gustong magpabakuna. Kinahanglan lang nila magdala og ID o Barangay Certification apan aron mas madali ang proseso mas maayong magpa-rehistro sila sa sistema sa siyudad.
Gipahibawo sab ni Ibones nga apil gihapon niini ang mga bata niini apan ang ilang vaccination site adto lang gihapon sa Southwestern University PHINMA ug Robinson’s Cybergate ug pwede gihapon walk in. —IBM (BANATNEWS)