2 sikop sa managlahing buy-bust

CEBU, Philippines — Nasikop sa hiniusang operasyon sa mga tinugyanan sa Philippine Drug Enforcement Agency Central Visayas ug kapolisan ang 26 anyos nga lalaki atol sa buy-bust operation diha sa Barangay Basak San Nicolas ning Dakbayan sa Sugbo, Martes sa kaadlawon.

Ang nasikop human gitaho sa Isumbong mo kay Wilkins mao si Neil Vincent Enriquez, walay trabaho ug residente sa maong lugar.

Nasakmit gikan sa dinakpan ang pito ka putos sa gituohang shabu nga motimbang ug 5 gramos nga mobalor ug 34 mil pesos, buy-bust money ug ubang kagamitan sa ginadili nga drugas.

Matud pa ni Leia Albiar-Alcantara, tigpamaba sa PDEA-7, nilanat ug tulo ka semana ang ilang pagpaniid sa dinakpan una natigayon ang operasyon batok niini.

Si Enriquez giingong makadispatsar og 20 ngadto 30 gramos nga shabu matag semana.

Samtang usa ka ex-convict ang nasikop usab sa buy-bust operation sa mga sakop sa City Intelligence Unit diha sa sitio Sambag, Barangay Kamputhaw Dakbayan sa Sugbo kagahapon.

Ang dinakpan naila nga si Niño Alindao Ahig, 31 anyos kinsa nakuhaan og 22.2 grams sa gituhuang shabu nga mibalor og P150,960. —MEL (BANATNEWS)

Show comments