Pwersa sa militar gipada sa Talisay

CEBU, Philippines — Dugang pwersa sa militar ang midangat na sa Dakbayan sa Talisay aron pag-abag sa pagpatunhay sa kalinaw sa kapistahan sa siyudad. Si Police Lt. Col. Gerard Ace Pelare, pangu sa Talisay City Police Station miingon nga dakung tabang ang maong pwersa sa militar sa pagkontrolar sa mga tawo nga modagsa sa kapistahan ni Sta Teresa de Avila. Sa nasayran duha na ka tuig nga giputol sa kagamhanan sa Talisay ang mga cultural activities aron kalikayan ang panagtapok.

Hinuon gimenosan ra ang tawo nga mosulod sa simbahan ni Sta. Teresa de Avila ug gipili nga solemni ang relihiyosong kalihukan.

Si Pelare nanghinaot nga motuman ang Talisaynon sa ilang gipatuman nga lagda aron kalikayan ang pagkatap sa COVID-19.

Samtang ang mga manindahay gitagaan og higayon nga makatinda sa palibot sa simbahan sa bisperas sa kapistahan.

Apil sa gipatinda gawas sa simbahan ang mga namaligya og kandila nga taga lagyong lugar ug ubang mga baligya sa sidewalk.

Matud pa ni Janet Fano nga taga Dakbayan sa Carcar nga lisod silamakabaligya sa ubang lugar nga magpiyesta.

Apan sila nagpasalamat ni kapitan Edward Alesna sa barangay Poblacion nga sila gitugotan.

Basta piyesta sa Talisay dili sab gyud mawagtang ang lechon baboy nga nagdisplay na sa sayong buntag hangtud na sa gabii.

Giwagtang ang foot procession apan naa ang mobile procession nga paspas ra nga moagi sa karsada sa siyudad aron malikayan ang panagtapok sa katawhan. (BANAT NEWS)