CEBU, Philippines — Nagdumili na sa pagtabang ang pipila ka mga medical frontliner sa nagpadayon nga pagpamakuna diha sa vaccination sites nga ilang nadestinohan sa Dakbayan sa Lapu-Lapu.
Nunot usab kini sa wala na paghatag og food packs ngadto kanila. Si Mayor Junard “Ahong” Chan nipasabot nga nahitabo kini tungod kay nahurot na ang gahin nila nga salapi alang sa ilang coronavirus virus response sukad pa niadtong Septiyembre 10, 2021.
Sa maong sitwasyon, si Chan mangayo kini og dugang pundong salapi nga nalakip sa Supplemental Budget (SB) No. 3 apan ang maong gisugot nga gahin wala aprobahi hangtud karon.
“Naningkamot gyud ta nga makahatag ta nila sa ilang pagkaon kay mao raman gyud nay paagi sa ilang pag-volunteer, wala mana sila’y bayad. So, pagkaon ra gyud atong gi-provide sa ilaha”, ni Chan pa.
Si chan padayon karon nga nanghangyo sa mga sakop sa konseho nga aprobahan ang SB No. 3 nga nikabat ngadto sa P81 milyones ang kantidad diin lakip niini ang P45 milyones nga gahin alang sa COVID-19 response sa kagamhanan sa maong dakbayan.
Nasayran nga gi-deferred sa konseho ang maong SB no.3 tungod sa pipila ka quetionable items sa liquidation sa ilang COVID - 19 related expenditure niini. —BDB (BANATNEWS)