“Morgue” may mga kalapasan

Nakaduso na og report ang Cebu City

CEBU, Philippines — Health Department ingon man ang Business Processing and Licensing Office(BPLO) ngadto sa City Legal Office kalabot niadtong morgue sa St. Bernard Funeral Homes nga nakitaan og daghang patay’ng lawas nga giingong wala natarong sa pagdumala.

Si Dr. Jeffrey Ibones, Officer-in-Charge sa Cebu City Health Department miingon ang girekomendar nila sa City Legal Office mao nga dili ipagamit sa maong katuyoan ang maong building ug sirad-an kini.

Kini tungod kay wala kini sanitary permit ug girekomendar sab nilang ipakuha ang tanang patay’ng lawas didto ug ipalubong dayon; gibutyag sab niya nga ang freezers nga gisudlan sa mga patay dili mao.

Giklaro ni Ibones igo ra sila morekomendar apan ang desisyon naa gyud sa City Legal Office.

“Other recommendations we will (ipuno) nalang sa City Legal and the business permit kung unsa pa. So far, kana ra sa for the meantime,” ni Ibones pa.

Samtang si Atty. Jared Limquiaco, pangulo sa BPLO miasoy dunay permit ang St. Bernard Funeral Homes apan alang sa funeral/viewing services ingon man general merchandise lang sama sa baligya nilang mga lungon ug uban pang gamiton sa paghaya.

“Naa na silay from OBO, CHD, etc.etc. nga mga reports. So based sa investigations nila, agad ko sa unsay unified action sa Cebu City as a whole,” sigon ni Limquiaco.

Kahinumduman ang City Legal Officer Atty. Rey Gealon nihimo og 3-lawyer team aron pagsusi kun unsay mga kalapasang nahimo sa St. Bernard Funeral Homes. —IBM (BANATNEWS)