Sementeryo temporaryong ipasirado
CEBU, Philippines — Si Cebu City Councilor Dave Tumulak nagkanayon nga gumikan sa report nga ilang nadawat temporary nilang ipasirado ang sementeryo sa A. Lopez, Barangay Labangon, Dakbayan sa Sugbo.
Matud ni Tumulak nga nakadawat sila og report nga adunay manghabw og patay’ng lawas bisan og wala pa makaabot og lima katuig sukad sa paglubong aron pulihan og bag-ong patay.
Si Tumulak ug Dr. Alicemarie Aycardo, division head sa Cebu City Health Department nag-meeting kini aron i-monitor ang maong sementeryo.
Nasayran nga nangreklamo ang mga tagtungod sa mga gipanglubong sa maong sementeryo tungod kay giingong ang patay’ng lawas sa ilang kabanay gihilabtan nga walay pananghid ug giingong itunong og gabii ang pagkuha sa patay.
Niadtong buwan sa Agosto niining tuiga adunay 171 ka available nga lubnganan sa mga sementeryo sa siyudad nga gilangkuban sa Carreta-Cathedral, 26 ka bakante; 15 sa Carreta-Sto. Rosario; 76 sa Calamba; 19 sa Talamban ug 35 sa Mabolo. Sa laing bahin, gibutyag ni Tumulak nga gihangyo nila ang mga punerarya sa Dakbayan sa Sugbo sa tabang nga ilang mahatag sa dakbayan.
Ilabi na karon nga daghang naglinya sa mga crematorium sa siyudad kinsa gusto nga ipa-cremate ang ilang mga minahal sa kinabuhi nga namatay.
Matud usab ni Tumulak nga nahinabi niya ang presidente sa Cosmopolitan Funeral Homes Richard Dychangco ug nangayo siya og tabang niini hinungdan nga nagpadala kini og duha ka sets sa mortuary freezers nga matag set mahimong mabutangan og upat ka patay’ng lawas.
Ang maong mortuary freezer anha ibutang sa Cosmopolitan ug mao kini ang butangan sa patay’ng lawas sa non-COVID-19 tungod kay unahon sa pag-cremate ang mga namatay sa COVID-19. —BDB (BANATNEWS)
- Latest
