Crime rate sa dakbayan sa sugbo ningminus

CEBU, Philippines — Namatikdan ang pag-ubos sa krimen dinhi sa Dakbayan sa Sugbo, suma pa ni Police Lieutenant Colonel Wilber Parilla, Deputy Director for Operations sa Cebu City Police Office.

Si Parilla miingon nga posibleng hinungdan niini mao ang presensya sa kapolisan ug ubang law enforcement agencies diha sa kadalanan nonot sa pagpaubos sa siyudad sa Modified Enhanced Community Quarantine MECQ.

Matud ni Parilla nga sa unang mga adlaw sa Agosto, walay natala nga pagpamusil sa siyudad, kini tungod kay daghan man sakop sa army, kapulisan ug force multipliers ang makita sa kadalanan.

Lakip sa nakatabang sa pag-ubos sa crime rate mao ang limitado nga paglihok sa katawhan ug ang 24 oras nga presensya sa kapolisan ug ubang law enforcers tungod sa gipatuman nga quarantine status.

Gidugang ni Parilla nga magpabilin ang kanunay nga presensya sa mga otoridad diha sa kadalanan samtang ubos pa sa MECQ ang Dakbayan sa Sugbo.— MEL (BANATNEWS)