CEBU, Philippines — Si Police Colonel Josefino Ligan, direktor sa Cebu City Police Office niawhag sa mga mogawas og lapas na sa curfew nga magdala sa ilang mga dokumento aron dili sila dakpon o malangay ilabi na nga hugot nang ipatuman ang istriktong health protocols. Matud ni Ligan nga sa gabii sa adlaw nga Biyernes mopahigayon sila sa paghingusog sa kampaniya sa “Oplan Bulabog” ug lakip usab ang pag-checkpoint diha sa kadalanan.
Giawhag ni Ligan ang mga mogawas nga lapas sa alas 10:00 sa gabii ilabi na kadtong mohatod kanila nga magpakita lang og dokumento gikan sa ilang mga buhatan nga ilahang sakop sa banay ang naghatod.
Giingong masinati karon nga mas istrikto ang siyudad ug adunay mga checkpoint ug adunay molibot diha sa mga kabarangayan ug mga balay patigayon.
Dugang ni Ligan nga aron mas dili sila malangay maayo nga iandam nila daan ang ilang mga dokumento o ID sa ilang mga biyahe. —BDB (BANATNEWS)