Mga hospital puno na, Cebu City mag-hire 200 nurses
CEBU, Philippines — Mga tambalanan sa Dakbayan sa Sugbo giingong puno na usab kaayo kini tungod sa pagsige og saka sa kaso sa COVID-19. Si Dr. Peter Mancao, Deputy Task Force Leader for COVID-19 Vaccination Storm Rollout Program nibutyag nga ang tulo ka dagkong hospital sa Cebu City nga gilangkuban sa Chong Hua Hospital, Cebu Doctors University Hospital ug Perpetual Succour Hospital puno na kaayo kini.
"On the part of the private hospitals unfortunately we are full to the brim, if you go around to the three major hospitals, they are all full. The emergency rooms are all full”, matud ni Mancao.
Pipila usab ka ambulance provider ang giingong dili na modawat og tawag gawas lang kon adunay reservation sa tambalan ug kong wala pay bakante magpundo una diha sa amblunsiya ang pasyente sulod sa 24 oras hangtud adunay bakante sa emergency room.
Ang emergency rooms manghatag og priority numbers sa dili pa ang medical personnel makaatiman sa usa ka pasyente. Si Acting Mayor Michael Rama niawhag sa katawhan nga magpuyo sa balay.
"Do not wait for a stringent lockdown. Without having a stringent lockdown, families should initiate a lockdown among their family members. If you do not have important trips outside of the house, do not go out”, matud ni Rama.
Subay niini, ang kagamhanan sa Dakbayan sa Sugbo gikatakdang mag-hire og 200 ka dugang nurses gumikan kay mag-expand man og isolation beds alang sa COVID-19 patients.
Sa maong gidaghanon sa nurses, 100 niini i-assign sa Cebu City Quarantine Center ug Cebu City Medical Center ug ang laing 100 adto sa private hospitals sa Cebu City nga mo-expand usab sa ilang bed capacities.
Ang Cebu City Sports Center himuon na usab nga isolation center diin ang mga pasyente nga adunay mild to moderate symptoms adto dad-on.
Si Dr. Jeffrey Ibones, officer-in-charge sa Cebu City Health Department nagkanayon nga ang cluster clinics sa pipila ka mga barangay i-reactivate kini diin ang mga pasyente nga dunay influenza like symptoms adto i-swab ug dili na kinahanglan moadto sa ospital. —Sanden J. Anadia/BDB (BANATNEWS)
- Latest
