Dugang 13 ka merchants niapil sa Sugbo Negosyo

CEBU, Philippines — Dugang 13 ka kompaniya ang niapil karon isip partner merchants sa Probinsiya sa Sugbo alang sa ikaduhang hugna sa Sugbo Negosyo program.

Ang Sugbo Negosyo usa ka micro-business assistance program sa Kapitolyo nga nagtinguha nga makahatag og supply o puhonan sa mga Sugboanon nga naapektohan sa pandemiya. Ang Kapitolyo gipangulohan ni Gobernador Gwendolyn Garcia nipirma og memorandum of agreement (MOA) uban sa 13 ka bag-ong merchants nga modugang sa kasamtangang 34 nga una nga niapil sa unang round sa Sugbo Negosyo niadtong niaging tuig.        

Ang pinirmahanay nahitabo niadtong Hulyo 21, 2021 uban sa opisyales ug representante sa maong mga merchant, opisyales sa Kapitolyo ug opisyales sa Mandaue Chamber of Commerce and Industry nga gipangulohan sa ilang presidente nga si Steven Yu.

Ang Kapitolyo nigahin og laing P100 milyones alang sa ikaduhang round sa maong programa.

Apil sa mga bag-ong merchant ang Akai Foods Inc., Asian Home Appliance, Atlas Cebu Corn Mill Corp., Agri Bounty Distribution Inc., Charoen Pokphand Foods Philippines Corp., Gaisano Brothers Inc., Gaisano Grand, Jacobs Basic First Venture, Uratex, Pacifica Agrivet, Prince Warehouse Inc., SM Appliance Center, ug Visayan Educational Supply.

Apil sila sa mapilian sa mga beneficiaries kon asa kini mokuha sa supply sa mga ibaligya unya mga produkto o serbisyo ubos sa Sugbo Negosyo program pinaagi sa coupon.

Sa unang round sa programa niabot sa 8,000 ka Sugboanon ang nakabenepisyo sa Lalawigan sa Sugbo. BDB (BANATNEWS)