CEBU, Philippines — Nakabaton og labing bag-o nga Mobile Command Center ang Dakbayan sa Mandaue nga gipalit gikan sa Czech Republic sa kantidad nga P22 milyones pesos.
Ang Mobile Command Center maoy magsilbi nga sentro sa operasyon ingon man coordinating office alang sa City's Disaster Risk Reduction Management Office (CDRRMO) Bureau of Fire and Protection (BFP) Philippine National Police (PNP) Traffic Enforcement Agency of Mandaue (TEAM) ug ingon man barangay focal person panahon sa kalamidad.
Suma pa ni Mayor Jonas Cortes nga tumong sa pagpalit sa maong mobile command center aron paghiusa ug pag-centralize sa datus panahon sa tanang matang sa insidente nga mahitabo sa dakbayan.
Gibutyag sa mayor nga kaniadto nasinati sa nagkalainlaing ahensiya sa kagamhanan ang panaglahi sa datus nga naglakip sa mga numero sa kabalayan nga nakahatag kaayo og dakong epekto sa matag molupyo.
“Automatic gyud na nga tanang mga hepe anha pangitaon, tanang reports anha usab gikan, "ni Mayor Cortes pa. Gipasabot niya nga ang hepe sa command center maoy adunay control sa mga alarma sama sa sunog, aksidente ug uban pa.
Samtang ang kadagkuan sa kapulisan sa Mandaue City Police Office, misusi sa matag police station kun nituman ba kini sa kamanduan ni PNP Chief Police General Guillermo Eleazar sa pagpanglimpyo sa ilang mga buhatan. Matud pa ni Police Lieutenant Colonel Mercy Villaro, tigpamaba sa Mandaue City Police nga sa ilang pagtuyok ilang nakita nga daghan nang kalambuan ang mga police stations. Lakip na niini ang ka-limpyo sulod ug gawas sa ilang opisina. —Rowena D. Capistrano/MEL (BANATNEWS)