CEBU, Philippines — Dili na libre sa mga barangay sa Talisay nga makalabay og basura sa landfill nga nahimutang sa Barangay Tapul.
Kini human ang pribadong kompaniya nga nakig kontrata sa siyudad nihimo na og polisiya nga ang matag barangay mobayad na og P700 matag tonelada nga basura nga ilabay sa landfill.
Si Edwin Nierves sa Ecological Solid Waste Management nagkanayon nga sa iyang nahibaw-an nga lakip sa kontrata mao ang pag-develop sa landfill ug dili lang ang pagkolekta sa basura.
Sa pagkakaron, iyang gibutyag nga suliran nila ang koleksyon sa basura ilabi na nga mangaguba ang truck sa pribadong kompaniya.
Ang barangay opisyales mohimo sa pagpangolekta sa basura apan ila nalang ibilin ang basura kung asa dapit moagi ang truck sa pribadong kompaniya.
Nagkanayon si Nierves nga pirme nila ipatawag ang atensyon sa kompaniya apan matag karon ug unya aduna gyu’y motumaw nga problema sa pagkuha sa mga basura.
Gisugyot ni Nierves nga unta adunay koordinasyon ang kontraktor ngadto sa mga opisyal sa barangay aron dali nga matubag ug masolusyonan ang reklamo sa katawhan. (BANATNEWS)