Dizon naghangyo nga menosan ang JOs sa City Hall

CEBU, Philippines — Mihangyo si Konsehal Alvin Dizon ngadto sa nagkadaiyang department heads sa Cebu City Hall nga hatagan og igong gimbuhaton ang ilang mga empleyado aron dili na magkinahanglan og daghang job orders. 

Suma pa ni Dizon nga imbes ang igasto alang sa daghang JOs, labing maayo nga ipalit kini og dugang tambal alang sa mga kabus, livelihood programs ug burial assistance.

Giklaro ni Dizon nga dunay kapin sa 5,000 ka mga trabahante ang City Hall ug iyang panghinaot nga makahatag kini og tukma nga serbisyo.

Wala hinuon siya masayod kun pila gyud ang kinatibuk-ang gidaghanon sa JOs. “Daghan pa man ta og importanteng butang ang angayan nga gastohan. Malouy sad ta sa ubang JOs kay ma-delay intawn ang ilang mga suweldo, maabtan pa og tulo ka buwan sa dili pa nila madawat ang ilang suweldo,” matud pa ni Dizon.

Namatikdan sa konsehal nga dunay ubang empleyado nga walay gibuhat ug naghuwat lang nga mahuman ang oras sa ilang trabaho, hinuon gidayeg usab niya ang mga trabahante nga nilihok gyud ug dunay dedikasyon sa ilang trabaho. “Dili raman tingale nga ako ray nakakita niana, kanang ubang empleyado kay wala ray gibuhat. Hinuon dili tanan ha, naa puy mga empleyado nga nagtinarong sad sa ilang trabaho,” suma pa ni Dizon. MEL (BANATNEWS)