Benepisaryo 4Ps hashasan

CEBU, Philippines — Hashasan na og maayo sa Department of Social Welfare and Development ang listahan niini sa mga benepisaryo sa Pantawid Pamilyang Pilipino Program (4Ps) ug panangtangon kadtong mga wala mosunod sa mga kondisyon aron sila mahatagan sa maong ayuda.

Kini human nga ang DSWD-7 padayon nga nakadawat og mga impormasyon bahin sa mga benepisaryo nga wala magpakabana pagusab sa ilang gawi bisan sila gipadad-an na og notisya bahin niini usa ka tuig na ang nakalabay.

Hinuon ang DSWD-7 mopadala og social worker sa maong mga benepisaryo aron tabangan sila nga mag-usab ug giyahan aron ilang masunod ang mga guidelines aron masalbar pa sila ug dili hingpit matangtang sa listahan.

“Through the case management process, the beneficiary undergoes a transformative process, as he/she is guided with new information and ways, evaluate past ideas, beliefs, and understanding through critical reflection leads to a change of perception,” sumala pa sa maong ahensya.  Ang mga mga benepisaryong nakatuman sa mga guidelines magpadayon nga makadawat sa ilang ayuda.

Ang mga kondisyon o guidelines nga kinahanglan buhaton mao ang pagpatungha nila sa ilang mga anak sa eskuylahan, pre and post-natal care sa mga inahan, regular and preventive check-ups para sa ilang mga anak nga nag-edad og 5 anyos paubos, pagpapurga sa mga bata gikan sa edad 6 anyos hangtud 14 anyos,  ug pagtambong sa  binuwan nga Family Development Sessions.

Base sa balaod, ang matag pamilya makadawat og P750 kun sila motuman sa health and FDS, ang mga batang nagtungha nga gimonitor sa programa dunay tag P300  samtang kadtong naa sa junior high  tag P500 ug P700 kadtong naa sa senior high school.

Ang education grant benefit sa ahensiya mahatag ngadto sa tulo ka anak sa pamilyang benepisaryo sud sa napulo ka bulan kada school year.

Kahinumdoman nga giaprubahan ang National Advisory Council (NAC) Resolution 1 series of 2021, “Adopting the Guidelines for the Removal of Persistently Non-Compliant Beneficiaries in the Pantawid Pamilyang Pilipino Program (4Ps).”

Ang Republic Act (RA) 11310 Section 12 nag-ingon: “should the qualified household-beneficiary so notified persists in not complying with the conditions within a period of one (1) year since the day of receipt of the written notification, the household-beneficiary shall be removed from the program.”

Niadtong Abril tuig 2019 gipasar ang RA 11310 nga gituyo sa gobiyerno aron tabangan ang mga pamilyang kabus nga naglisod pagsustinir para sa ilang panglawas, nutrisyon, edukasyon sa ilang mga anak.

Apan kadtong nahisgutang mga kondisyon kinahanglan nilang tumanon aron magpadayon sila pagdawat sa ayuda gikan sa DSWD. —The Freeman/IBM (BANAT NEWS)