CEBU, Philippines — Usa ka establisamento ang gipahimangnoan human nasuta nga nakalapas sa minimum health protocols atol sa pakisusi sa kapolinsa niadtong Sabado sa gabii diha gilibkas na ang liquor ban sa siyudad.
Kini ang gitug-an ni Police Colonel Josefino Ligan, direktor sa Cebu City Police Office. Matud ni Ligan nga ang maong establisamento over crowded kini o nagdasok ang mga tawo.
Ang mga establisamento nga makahimo og tulo ka kalapasan posibleng bakwian kini sa ilang permit ug matak-opan. Ang kapolisan nisuroy kini sa mga establisamento uban ang mga personnel sa mga buhatan sa kagamhanan sa Dakbayan sa Sugbo aron sa pagsusi kong nituman ba ang maong mga establisamento sa mga palisiya.
Samtang si Konsehal Joel Garganera, deputy chief implementer sa Emergency Operation Center makigtigom sa mga tinugyanan sa Philippine Statistic Authority, Association of Barangay Council ug kapolisan kalabutan sa national ID registration ug ang pagpahigayon sa mga community pantry ilabi na sa mga lugar nga apektado sa sunog niadtong Lunes sa hapon. Matud ni Garganera nga sa maong mga kalihokan kinahanglan kini og koordinasyon aron malikayan ang samang hitabo sa nilabay’ng semana diin nagkagubot ang pagpanghatag sa community pantry ug pagrehistro alang sa national ID system.
Tinguha sa EOC nga malikayan ang pagsaka sa kaso sa COVID-19.
Sa laing bahin, hatagan og prayoridad sa registration center alang sa national ID system ang senior citizens diin kinahanglang aduna silay appointment slip diin nabutang niini ang ilang schedule sa pag-anha sa registration center.
Ang mga rekisitos nga dalhon sa pag-adto sa registration center mao ang appointment slip kon anaa man ugaling, senior citizens ID o valid ID, SSS/UMID, passport, driver’s license, Tin, Philhealth ID, voters ID, original certification sa Philippine Statistic Authority (PSA) live birth ug ID picture.
Mahimong moadto sa registration center sa Lungsod sa Consolacion alas 7:00 sa buntag diin bukas kini hangutd sa alas 3:00 sa hapon. Romeo T. Limpangog/BDB (BANATNEWS)