Istriktong health protocols ipatuman sa CCSC

CEBU, Philippines — Ang konseho sa Dakbayan sa Sugbo nihangyo ngadto  sa Cebu City  Sports Commission alang sa istrikto nga pagpatuman sa minimum safety ug health protocols alang sa  outdoor physical activities diha sa Cebu City Sports Center (CCSC).

Naglangkub kini sa social distancing, pagbutang og signage alang sa safety and health awareness ingon man ang pagplastada sa gidaghanon sa makasulod diha sa sports center.

Si Konsehal Nestor Archival niduso og resolusyon diin giaprobahan kini sa konseho sa siyudad sa niaging adlaw.

Nasayran nga base sa pagtuon sa Word Health Organization ang regular physical activities makahatag og kaayohan sa panglawas diin mopaubos kini sa  high blood pressure, motabang sa pagkontrolar sa timbang ug mopaminos sa risgo sa  stroke, type 2 diabetes,  cancer ug ubang kondisyon.

Niadtong Mayo 3, 2021 gibuksan sa pagbalik ang track oval sa CCSC ug gihangop kini sa mga mahiligon sa jogging ug walking.

Ang CCSC sulod sa usa ka tuig kini wala magamit sa publiko tungod sa pandemiya.

Ang CCSC gigamit kini kaniadto isip estaranan sa mga polis nga gikan sa laing lugar nga gi-deploy sa siyudad aron sa pagbantay sa movement sa katawhan alang sa gipatuman nga quarantine.

Sa pagbalik sa operasyon sa CCSC ang tagdumala niini istriktong nipatuman sa health protocols sama sa pagsul-ob og face mask sa mga mosulod.

Gitugotan lang nila ang 200 ka tawo nga makasulod sa susamang oras aron mamentinar ang physical dancing diha sa sulod.

Ang CCSC moabli kini gikan sa alas 5:00 sa buntag hangtud sa alas 8:00 sa gabii ug adunay ipahigayon nga regular nga pag-disinfect ang maong pasilidad. BDB (BANATNEWS)