CEBU, Philippines — Human sa kapin sa usa ka tuig nga gisirhan, gipaablihan na sugod kagahapon sa konseho sa Barangay Guadalupe sa Siyudad sa Sugbo ang taytayan nga nagsilbing access road alang sa pipila ka bahin sa maong barangay ngadto na sa Barangay Kalunasan ug Capitol Site.
Suma pa sa kapitan sa maong barangay nga si Michael Gacasan nga ang ilang hukom pinasubay usab sa pagtugot sa kapolisan.
Matud pa niya nga niminos na ang kaso sa COVID19 sa ilang barangay ug giingong dako usab og tabang ang maong taytayan sa pagpaminos sa problema sa trapiko ilabi na karong panahona nga nagkadaghan na ang nanagan nga mga pribadong sakyanan.
Ang maong taytayan usab maoy nagsilbing shortcut sa mga motorista nga moadto sa bukirang bahin.
Kahinumdoman nga dunay mga higayon kaniadto nga naabot og kapin sa 200 ang active cases sa COVID19 sa Barangay Guadalupe.
Apan niadtong Mayo 4, aduna na lang kini natala nga kapin sa 20 ka aktibong kaso.
Sukad sa pag-ulbo sa pandemya sa miaging tuig, ang Barangay Guadalupe aduna nay total cases nga 2,352.
Giawhag ni Gacasan ang iyang mga konsituwente nga bisan niminos na ang kaso sa COVID-19, dili gihapon angayan mokompyansa ug kinahanglan tumanon gihapon ang health protocols.
Subay niini walay puas ang ilang pag-roving sa mga sitio ug istriktong gipatuman ang curfew. MEL (BANATNEWS)